回主頁　ホームへ

第十二日　６／５（水）　 東京：重點出擊

今日會去 o既 "三鷹の森ジブリ美術館"，相信係每個香港遊客來到東京，其中之一個必遊 o既地方。我雖然唔係宮崎駿 o既 FANS，但都幾欣賞佢ｄ動畫架。所以我對呢個美術館有少少期望架。Ｌ君就仲厲害，2001年10月開張以來，未夠一年已經來第三次！唔通呢度佢有份 o既？

來到 JR 三鷹站前，見到有架前往美術館 o既巴士等緊客。但好一個Ｌ君竟然話：「後生仔行多兩步路啦∼」咁我地就係如此這般徒步１５分鐘前往喇。去到入口處準備進場，由於我地係在香港買定飛，所以係唔使分場次，隨時入場都得。好 nice o既 STAFF 姐姐見到我地港燦２名樣，即刻好醒目地派左中英文各一份 o既案內俾我地。哼，又係我地扮勁 o既時間喇：「哥哩摩箍打西媽腥架？」（これもくださいませんが？）手指指份日本語案內。結果梗係得手啦∼

館內真係好多野睇，尤其是見番ｄ熟悉 o既動畫人物＆景象，份外倍覺親切。另外亦可以睇番宮崎駿 o既手稿真跡同埋一ｄ當時拍攝時 o既道具 & 花絮，都係令人覺得好有趣∼　跟住周圍影下相（只限室外）：天空之城果個機械人就一定唔會走雞啦∼　另外龍貓巴士呢，就只係准許１１歲以下小朋友入去玩，又唔俾撮影！好巴閉咩？！好彩我在長崎已經有幸坐過o即∼（DAY 5）呢度懶係嚴格限制咁，我真係唔稀罕呀∼

回程都係徒步返去吉祥寺。途中經過著名 o既井の頭公園（漫画ＧＴＯ入面經常提及到）但我又見唔到鬼塚老師喎 ...... 去到吉祥寺站前周邊，猛然發現有間 FANCL HOUSE！即刻拿拿聲拎份 LIST 出來執藥咁執。（幫人入貨的確係一件苦事∼）俾我搵到唔知乜東東 o既「德用裝」 x 3 之際，望見個架得番兩盒。於是我同個姐姐仔講：「これもう１つください」點知我咁樣講又惹來呢位靚靚姐姐之調戲：「え∼ 日本語上手ですね∼　留学生ですか。ふふふ・・・」又問我梗係來睇世界盃啦。著住件波衫係邊隊架？ ...... 好彩我僅僅聽到 UNIFORM 呢個字，於是即刻答佢：「i lu 欄墮」（IRELAND）「嘻嘻嘻嘻 ...... 」姐姐係咁掩住咀笑。啊！咁易就笑 o既？掂呀掂呀！我ｄ自信即刻返晒黎∼∼

夜晚去台場食晚飯兼順便影彩虹橋夜景。意粉好好食，夜景好好睇。我呢個攝影バカ，都係第一次用傻瓜機個曝光 FUNCTION 影夜景咋∼　出來個效果居然唔錯喎！一ｄ都唔失禮架∼（有時天份 o既野 ...... 咳咳 ...... 呀下 ......）

＜第十二日完＞

早：池袋 HOTEL CENTER CITY 早餐 BUFFET

午：MOS BURGER @ 吉祥寺

晚：ITALIA 料理 @ お台場

住：池袋 HOTEL CENTER CITY（２連泊）