回主頁　ホームへ

第十一日　６／４（火）　 RETURN TO TOKYO

離開北海道喇∼　今日o既行程係搭足全日車。為免太夜落到東京，我地大清早七點鐘就起行，第一站先去函館。來函館除左係買手信之外，另一目的就係要食餐勁o既！頭圍用膳首先係去朝市裡面一間頗為出名之食店：恵比寿屋食堂。2400円三色海鮮丼做早餐，奢侈ｄ都要架喇∼　返回東京無咁靚o既海膽＆蟹子食架喇。食飽飽後，要做正經野喇。咪就係買手信囉（大會指定動作）！行下逛下睇下又買下，三粒鐘好快過，荷包亦好快乾塘！

函館 --> 盛岡 13:40 出發。呢程車足續要坐４粒鐘，愛黎小休就最好不過啦。諗住食飽睡一睡好過做元帥，點知前排有位束短金髮中等身材年約 25 － 30 之西洋籍男子，見我又係著住波衫（佢著果件係絕版德國隊主場），竟然唔知醜地走過來搭訕！無計啦，都要應酬一下。結果我o既唔鹹唔淡無 grammar 大石流英語，又要頂硬上大派用場喇。（Ｌ君竟然攤晌度扮瞌著左！（怒∼）　無義氣咪就係呢ｄ囉∼）

由於大家都有共同話題，天南地北大講波經；講完世界盃又講日本旅行又講搭ＪＲ心得，我地都講得幾投契架。講講下，佢忽然醒一招「JR PASS 秘技活用術」我歎！佢話平時呢，就將個 JR PASS 有咁細就摺咁細，到出入閘要 show PASS 果陣，就懶係慢慢攤番開俾個 STAFF 睇，再加一個加州式陽光微笑。通常未翻到內頁呢，個 STAFF 都會揮手示意，俾佢直行直過咁話喎∼　佢o既鬼主意大家都明啦∼　真係離晒譜！想 expired 左都照用？你估 JR o既 STAFF 係豬標咩∼...... 我等陣出閘果陣又測試下先∼∼

（實驗證明，JR o既職員果然又盡責又訓練有素！好有耐性咁等我 show 埋內頁，再驗屍咁驗先至肯放我走∼∼　哼！下次我染完金毛再穿兩隻耳環，睇下效果有無唔同？？）

到達盛岡，點止係轉車咁簡單？餘興節目就係食冷麵！車站旁邊地下街成層都係 Restaurant，其中一間叫做「明明家」。門面唔錯喎，入去試下先。唔∼ 佢地o既冷麵好味就唔在講，最緊要就係麵上舖上一「楷」青森蘋果！！我o既評語係：四個「大」字！！（即係咩？識用倉頡o既唔該噤一噤黎睇下∼）

食麵中途，咁o岩又係日本 vs 比利時o既開波時間，咁o岩出面又有部大電視！咁就梗係睇埋先走啦∼　結果再搭遲幾班車，搞到要夜晚 10:30 pm 先至落到東京，返到酒店都成 11pm 囉。舟車勞頓 + 身心疲累，今晚真係要好好抖一抖。OYASUMI∼

＜第十一日完＞

早：海鮮三色丼 @ 恵比寿屋食堂

午：便當買上車食

晚：盛岡冷麵 @ 盛岡

住：池袋 HOTEL CENTER CITY