回主頁　ホームへ

第九日　６／２（日）　 札幌到着

尋晚乘搭 o既 TWILIGHT EXPRESS，係小弟去日本咁多次第一次訓寢台列車咋∼（之前訓過 NOBI-NOBI 唔好計），對我來講又係一個新體驗！好野！

呢架 TWILIGHT EXPRESS 有咩咁威呀？原來佢係目前為止，日本國內路程最長（1511.4 km）時間最耐（21 小時 7 分）o既一班列車（大阪 ←→ 札幌）。如果搭足全程的話，唔係講笑齋睇風景真係幾悶架。我地途中上車，差不多係進入北海道前o既最後一站：新潟縣新津站 → 札幌，都要坐十幾粒鐘。好，上車！睇下有ｄ乜野設施先 ∼∼ 

寢台位置方面，一卡車大約有十數個 PARTITION；每個 PARTITION 有兩張碌架床，上下兩格合計４個位啦。如果咁 o岩自己４個朋友住埋一格就過癮咯！通宵鋤大Ｄ甚至開檯打番四圈都仲得呀！可惜我同Ｌ君被分派到唔同床位：佢果格下面係一對年紀老邁 o既夫婦，不過未夠八點鐘就訓著左囉。至於我呢，下格床兩位係兩名年約五十之日本師奶，上格 o既另一邊就係佢地 o既男同事。我少不免又被人盤問一番：你係邊度黎架，來日本做乜呀，係咪留學生呀，點解識聽我地講野呀（其實唔係好明）・・・等等。我被嚴刑迫供左大約左半個鐘之後，佢地終於肯放我去洗手間。嘩 ∼ 出去抖啖氣先！

周圍睇下先。首先走去 SALON CAR 果度搵張梳化攤下，鐘意的話可以叫杯野飲添！睇下 MENU， 啊∼ 成 1000 円一杯，仲話係「おすすめ各種」！我都係幫襯出面汽水機 150 円好過咯。不過呢一卡車有個落地大玻璃窗，望出去就係日本海之沿岸景色，幾好 FEEL 架！（圖中少少綠色果一忽咪就係我囉，幾咁悠然自得！）可惜當時天色已晚，無乜風景睇。或者聽朝一早再來坐過啦！

跟住去隔離就係 DINING CAR。原本我地可以順手一早預約埋今晚晚餐晌呢度食，但係睇下個價錢？ 12000 円法式料理！個名就好勁呀：「DINER PLEIADES 今晚打老虎喪波卡地亞・・・」（後面果幾隻字係大石流法蘭西語），不過全部菜式都係細細兜兼且貴夾唔飽。另外唔想食法國料理亦可以揀個日式御膳，不過都要 6000 円一位。・・・我地都係晌度影下相算罷啦∼∼

跟住就再行返去 SALON CAR，隔離有一樣好偉大之設施：SHOWER ROOM！！你話夏天黎計日頭行到身水身汗，夜晚唔沖番個靚涼邊處訓得著呀？OK，要用沐浴設施個手續就係先去 DINING CAR 個 STAFF 果度買張 SHOWER CARD，然後去 SHOWER ROOM 熨一熨張 CARD，咁就搞掂喇，扭開花灑就會有水出。不過此時個倒數 COUNTER 亦立即啟動，限時６分鐘（！）又要洗頭又要捽老泥又要沖乾淨ｄ肥皂泡，真係事前要好好計劃一下，否則的話成身滑潺潺咁出返來就真係唔知點算！（傳聞話一夠鐘唔單止無水出，道門仲會自動彈開添！！但已經被我證實左係無呢回事，大家請放心！）

第九日 Part II