2002
FIFA WORLD CUP™ 觀戰大体驗
| 平成 14 年 5 / 6 月 | ||||||
| 日 | 月 | 火 | 水 | 木 | 金 | 土 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
第八日 ６／１（土） 
愛爾蘭 vs 喀麥隆
今日係小弟人生之中非常重要嘅一日，因為由細細個開始就連發夢都諗住去現場睇世界盃。今日，呢個夢想終於即將實現喇∼∼唔開心興奮就有鬼囉！所以今朝一早起身就整裝待發，GEL 恆個靚頭（DAY 2 飛完髮以來第一次梳頭），披埋件愛爾蘭戰衣，咁就為之 VERY GOOD。告別越後湯沢，出發去新潟！！
去到車站，見個月台冷清清，諗住無乜乘客同我地爭位坐，人都安心ｄ（因為呢程車無預約到指定席）。點知人算不如天算，列車到站後望一望。。。嘩！成架車擠滿晒人，全部都係紅鬚綠眼嘅熱情球迷！！我諗無９成都有８成係愛爾蘭人！佢地著晒綠色衫坐滿＆企滿晌車廂入面，我同Ｌ君都要企晌卡與卡之間嘅空位咋∼∼。因為小弟亦都有著住件波衫，所以一上車就受到其他球迷報以微笑以示歡迎。有個比較熱情嘅仲大大力從後拍我一野，用英語腔對住我講：「CORN NEAR CHEER WA∼。」我即刻回應：「HELLO！I COME FROM HONG KONG！」（咪當我係日本人）跟住就握握手大家做個好朋友。騎騎∼∼我ｄ大石流香港式英語一ｄ都唔失禮架！
到達新潟站，我地並唔係即刻出閘，而係轉信越本線往新津擺低大型行李在
LOCKER，因為今晚會由呢度出發坐夜車往札幌。再返到去新潟站，同尋日相比截然不同。淨係個大堂已經變得人頭湧湧，水洩不通。當中除左大部分係愛爾蘭人之外，仲又好多日本人係一家大細一齊去睇波；另外都有少數係著晒民族服裝嘅黑人，相信係來自喀麥隆架啦。淨係車站已經咁熱鬧，一陣去到球場仲得了？！望下隻錶，距離開波時間仲有３個幾鐘，一於去市中心逛下先，順便食埋
LUNCH
先至入場丫嘛。行下行下好似撞到熟人喎。咦？咁面善嘅？你咪就係星爺？原來係少林足球個紙板人形。睇黎佢地係為左配合世界盃，特登揀正今日晌日本作全國首映，所以咪晌街頭擺個檔搞下宣傳囉。旁邊仲整個
GOAL射龍門遊戲攤位添！呢ｄ情況小弟梗係唔會執輸，即刻排隊玩下賣弄下腳法先。小弟當然不負所託，踢３球全部撻Ｑ射歪晒！結果博得大會＆全場觀眾嘅同情，都送左個襟章仔俾我作為安慰獎。（但係跟住我後面果位１０歲小朋友竟然３射全中！咁唔俾面？？）
| 前言 | 第四日 神戶→名古屋（速去速回） | 第八日 新潟：現場觀戰大體驗 | 第十二日 東京：重點出擊 |