2002
FIFA WORLD CUP™ 觀戰大体驗
| 平成 14 年 5 / 6 月 | ||||||
| 日 | 月 | 火 | 水 | 木 | 金 | 土 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
第七日 ５／３１（金） 越後湯沢・新潟
大家可能會問，呢幾日亂咁行得好地地，做乜事無喇喇返東京呀？唔通來個反高潮？實情都係我唔好囉。今日嘅目的地其實係新潟，尋晚由大阪本來可以乘搭「急行きたぐに」直達新潟，不過我有件心事未了結。大家仲記唔記得小弟上次訂極都訂唔到夜行巴士之憾事？今次幾大都要試一劑！（新體驗丫嘛！）結果朝早六點半東京到着後小弟接受訪問・・・
Ｌ君：「搭完喇，有咩感想？」
我：「唔・・・正如ＥＳＰＮ講波佬黃Ｘ桂話齋：『有今生，無來世！！』」
貼錢俾我都唔會再搭！！皆因座位對我來講算係幾窄，一旦坐低立即動彈不得。如是者坐左３粒鐘，最後終於頂唔順，走去車頭最前排打橫一攤霸晒３個位（咁啱無人坐），再搵個大背囊「攝」入座位之間空隙頂一頂條腰，先至有覺好瞓咋！回頭望番其他乘客，又唔係咁辛苦咋喎！甜絲絲流晒口水，瞓得不知幾咁冧！・・・淨係我有問題？？
晨早流流都唔知去邊好・・・就去築地魚市場啦！其實之前都去過架喇，所以今趟都無打算行入街市裡面。果度熙來攘往人山人海，費事阻住人做生意啦，晌外面睇下雜貨店尋找下美食仲好啦。結果去左一間名叫井上嘅麵檔（無座位，全店立食），聽聞話係全東京排名頭５位之內！舖仔細細，咁巴閉？試食試食。もぐもぐもぐ・・・・・・食完。評價如何？連湯都飲晒囉！！
又要走喇，搭新幹線：東京→越後湯沢。本來係直上新潟嘅，但之前
BOOK 唔到新潟嘅任何宿泊地，一個月前已經話 FULL
晒！唯有退而求其次，揀左呢度遠少少得黎交通都算方便嘅越後湯沢。到着後，時候尚早，未到
CHECK-IN 時間，於是放低行李在呢間傳統和式旅館：白銀閣華の宵，再四圍逛逛。越後湯沢都算係新潟縣內一個頗為有名嘅旅遊勝地；除左溫泉旅館多之外，冬天就更加熱鬧，因為附近有滑雪場丫嘛。我地晌呢個咁有日式
FEEL 嘅地方，反而誤打誤撞走左去一間法式料理食 LUNCH，我都要寫個服字俾自己。
| 前言 | 第四日 神戶→名古屋（速去速回）
第七日 越後湯沢・新潟 |
第八日 新潟：現場觀戰大體驗 | 第十二日 東京：重點出擊 |