2002
FIFA WORLD CUP™ 觀戰大体驗
| 平成 14 年 5 / 6 月 | ||||||
| 日 | 月 | 火 | 水 | 木 | 金 | 土 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
第五日 ５／２９（水） 長崎・佐世保
８：５１長崎到着。
昨晚夜車其實唔算好辛苦，都有幾粒鐘訓下。呢架あかつき號嘅指定席都ＯＫ架！（上次博多→大阪又係搭呢架）不過話晒係今次行程嘅第一晚夜車，開頭梗有少少唔慣啦。到站後，Ｌ君與我都係在懵下懵下 FING 晒頭之情況下落車，好彩無賴低野啫。呢個時候，如果有杯香濃嘅咖啡醒一醒神就最好喇！卒之就行左去長崎站對面嘅一間喫茶店，名叫珈瑠王它瑚：一個非常作狀嘅店名（Ｌ君話唔知邊本旅遊書介紹過）。入去坐低叫野食先。晨早流流竟然有 PIZZA 食！就呢個 SET 啦唔該。呢度環境氣氛唔錯，食物都唔錯，不過 一件餅仔＋超細杯咖啡收 700 円就貴左ｄ。
買左一日乘車券，搭市電周圍去都得啦。首先去原爆記念公園。啊，都有唔少遊人喎，其中大部份係一團團見學嘅學生哥，而拎住旗仔嘅導遊就全部都係上左年紀嘅阿伯；作為原爆嘅生還者，由佢地親自來講番當時嘅經歷可能會特別有說服力。希望佢地如實報導，唔好歪曲歷史啦。
行完公園，原爆資料館就晌附近，當然要去睇睇。入到館內，一幕幕珍貴戰時圖片＆影像盡現眼前。主要係敘述番
1945年８月９日當時被爆時嘅受害情況＆前因後果，點解會被選為襲擊目標，同埋被爆後長崎市之善後重建工作等等。老實講，畢竟呢個係日本人自己建立嘅資料館，講番呢ｄ野都預左會帶有主觀成份架喇。佢地以長崎市民受害者之身份，一路標榜住佢地係歷史上真真正正唯一受過原子彈襲擊嘅城市之一（另一個係廣島）。雖然有好多野都迴避左，但都算叫做忠於歷史，字裡行間都肯承認侵華史實＆南京大屠殺事件，總算有番少少自責之心。中肯ｄ講句，呢度展示左咁多戰時慘痛嘅經歷，無非都係想話俾人知戰爭係一件幾咁可怕嘅事情。打來打去，你炸我我轟你，幾咁無謂呢。總之點都好，真係要衷心祝福一句：世界和平！ 圈內細字：１２月南京占領，大虐殺事件おこる（發生）
好，頌讚和平，傳揚友愛，繼續我地和平之旅：下一站係平和公園。呢個公園係位於原爆遺址附近一個小山丘上面，每年８月９日長崎原爆日都會晌呢度舉行「平和祈念式典」。唔詳細介紹喇，請睇相。
乘搭市電到長崎嘅另一邊，參觀一下天主教堂，外國人園地等等嘅西式建築。又講下歷史先：日本晌明治時代（百幾年前）之前係屬於鎖國時代，日本全國得幾個城市（例如長崎，神戶，函館）係對外開放架咋。所以當時ｄ傳教士呀，外國領事呀，都係晌呢幾度地方落腳，亦理所當然地令到當地增添幾分歐陸色彩。我對呢ｄ東西合璧，和洋共處嘅地方都有ｄ情有獨鍾架，所以去親呢ｄ景點遊覽都係興致勃勃。啊，到站喇！行過去睇睇先。
| 前言 | 第四日 神戶→名古屋（速去速回）
第五日 長崎・佐世保 |
第八日 新潟：現場觀戰大體驗 | 第十二日 東京：重點出擊 |
|
結數 |
|
PIZZA + 咖啡： 735 円
一日乘車券： 500 円
原爆館入場料： 200 円
|