回主頁　ホームへ

第一日　５／２５（土）　　東京

第一次搭 ANA 由香港出發之早機，所以晨咁早六點半就要出門口。尋晚執行李執到３點訓，５點起身。由屋企到機場大概８０分鐘，但只係用左＄３.５０咋喎（地鐵免費單程車票一大張直達東涌，再轉Ｓ１巴士）。慳得就慳，唔好講笑。１０點起飛，訓陣先。

成田空港到着。誓估唔到即刻有新體驗！臨出海關果陣竟然咁好彩被關員截住要 CHECK 行李兼搜身，仲要係由女關員親自操刀（！）真係辛苦晒。

到 VIEW PLAZA 換領 JR PASS 一切順利；但跟住順便過隔離綠色窗口訂埋幾日後往札幌o既夜車，咁就出問題喇。我諗佢地平時幫人訂慣左 N'EX，其他路線唔係咁熟。我見佢係咁意 CHECK 下部機求其篤幾個 KEY 就話無位打發我地走，真係無品。算啦，捽佢都無用，唯有出到去東京再試試。

結果如我所料，東京站 COUNTER 呢位阿叔就唔同喇。眼仔碌碌兩下散手就幫我搞掂，仲問我寢台要補錢有無問題添！成個行程最擔心 o既就係呢班夜車。辦妥之後，終於可以放下心頭 bigstone。

去酒店喇。今次 PACKAGE 兩晚住宿安排左晌行程末段，開頭果幾日o既酒店就一早上網 BOOK 定。今次揀左呢間位於目黑o既 HOTEL PRINCESS GARDEN，都係貪呢頭好似好高尚，襯番我o既人格丫嘛。安頓好之後，都仲係五點幾，好早o者。於是近近地去澀谷行陣先。剛剛先至講起，做乜市面無厘世界盃氣氛架！下個禮拜就係個囉喎！點知話口未完就見到成架車俾個世界波撞凹左，就咁泊晌澀谷街頭。（呢單野唔關我事呀，唔係我做架！）咁樣黎做宣傳，又幾有心思喎！

晚飯過後，我地諗住去附近ｄ便利店度睇下有無 PRE-PAID PHONE 賣。小弟雖然已經問朋友借左一部 au，但諗住唔貴的話自己買番一部。行下行下搵左一輪，原來唔係間間便利店都有得賣；就算有，個款都係肉肉酸酸，買唔落手呀。於是索性買張增值 CARD ，用番部舊機算數。有機會見到靚野先再買都未遲。

＜第一日完＞

早　：香港老麥

午　：航機上

晚　：澀谷・道玄坂・燒肉定食

宵夜：目黑站前  INTERNET CAFE  飲み放題：３大杯 CALPIS

住　：目黑區 HOTEL PRINCESS GARDEN